بس، بس،،، بس، بس ،،، من غير كتر كلام ولا حس،،،، كله يأنتخ يكتم ويهس،،،
عايز أحكيلكو أوام حدوتة،، حلوة بسيطة لكن ملتوتة ، بس اجري أوامك هاتلك فوطة ،، علشان يمكن مرة تحس ،،،
قالولي زمان الدنيا جميلة ،،، وكله يعدي بهيلا وبيلا ،،، والحلم اللي اخدوه ترحيلة ،،، لسه بردو سامعله نفس،،،
شفت كتير دوخت ولفيت،، واتشطرت ياما وعكيت،، على نفسي لوحدي انا رديت ،، ومحدش قال نقسم بالنص،،،
اللي قالوه كبر عديها،،، فكك نفض دماغك فضيها،،،عيش يا اخينا روق قضيها ،،، وأحسن لك يابني بلاش تحس،،،
وبعيش في مية البطيخ،،، أفرقع بمب على صواريخ ،،، وكأني جي من المريخ ،،، اليوم بيومه يفوت وبس ،،،
أهرب أجري بلاش تفكير ،، ما انا ياما فكرت كتير ،،، لحد ما جاللي داق العصافير ،، وبقيت بصوصو من غير حس،،،
وبرفرف بجناح مكسور ،، مكسح بينط فوق السور ،،وكل شوية ينادوا "مسرور"،،، علشان ارجع تاني للنص ،،،
بجري بعيد مش عارف أرجع،، باكل بشرب أنام وأبلبع،،،وف الحظيرة عمال أرتع ،،، توهان هذيان تهليس وهسس،،،
بسأل نفسي أنا ليه عايش ،، جنب الحيط عايل عل الهامش، حيران مكتوم مذهول كاشش،، مبسوط بالعيشة جوا قفص،،،
أصلي بقيت خلاص متعود،،،، وعرفت يا بيه مصير المتمرد،،، ما هو أصله جبان وعميل متشرد،،، وبيفبرك حواديت وقصص،،،
بحرك وأفرك من جوايا،، ومحدش فاهم أيه الحكاية ،، أدادي في نفسي وأقول كفاية،، ما هو من تفكيري أنا عمري نقص ،،،،
بقيت مهكح م الشيخوخة ،، ودماغي حلاوة عالية ومنفوخة ،، وحاجات كتير تايهة وملبوخة ،،، ومن غلبه قام قلبي رقص ،،،،
بهري وبنكت دمي بيغلي ،، جسمي مدغدغ وارم مهري،،، بقى يتضاعف بالعشرة عمري،،، وياريت فيه غير فشر وهجص ،،،
بقيت جاني من مجني عليه ،،، راضي بالدور ده وطاير بيه ،،، وكل حياتي "أنا أعمل أيه؟"،،، أخس عليا يا ألف أخس ،،،،،
ليست هناك تعليقات:
إرسال تعليق