رقص على رجل ونص + مشي على الحبل بطراطيف الصوابع + كفة مايلة وكفة مخرومة = ميزان المدفوعات
عربية كارو بيجرها حمار اعرج + سقف مخرم وبيخر في المطرة + "عفوا قيد الصيانة الدورية" = قاطرة التنمية
كلمات متقاطعة واخبار الحوادث + تقميع بامية وتقوير محشي وتخريط كوسا + ماسنجر وفيس بوك وداونلوود = الرضا الوظيفي
صباح الخير يا جاري انت ف حالك وانا في حالي + "وانت مال أهلك " + الباب اللي يجيلك منه الريح سده واستريح = سياسة الباب المفتوح
فرش ملايات وردح وفضح + حدف بالجزم ورمي بالشباشب + تأجير بلطجية ونسوان سوابق شوضالية= الحوار الديمقراطي
بصل وفسيخ وملوحة وسلامونيلا + سحابة سودا مزاريب وعوادم + زحمة ولخمة و"قفلي على كل المواضيع" = شم النسيم
إزازة مسدودة باتنين متر مكعب فِل + بلاعة طافحة وبتبخ صراصير + مصفاة مهوية مفيش تحتها حلة= حرية التعبير
النفخ في إربة مقطوعة + سحب مقطورة اسمنت وقعت في الترعة + التعلب فات فات وفي ديله سبع لفات = دفع عجلة السلام
حمومة العيد الصغير + غسالة اطباق يونيفرسال شغااااال + تلميع جزم وورنيش عمولة وصبغة درجة أولى = غسيل الأموال
